ඇමරිකානු සම්බාධක උල්ලංඝනය කරමින් නීති විරෝධී තෙල් ප්රවාහනයේ නිරත වූ බවට සැක කෙරෙන රුසියානු ධජය සහිත නෞකාවක් උතුරු අත්ලාන්තික් සාගරයේදී අත්අඩංගුවට ගැනීමට ඇමරිකානු බලධාරීන් කටයුතු කර තිබේ. මෙම මෙහෙයුමට සමගාමීව කැරිබියන් දූපත් ආශ්රිත ප්රදේශයේදී තවත් තෙල් නෞකාවක් අත්අඩංගුවට ගෙන ඇති අතර, මෙම නෞකා ද්විත්වයම ජාත්යන්තර නීති රෙගුලාසි මග හරිමින් රහසිගතව ක්රියාත්මක වන "අවතාර නැව්" (Ghost fleet) ලෙස හැඳින්වෙන කණ්ඩායමකට අයත් බව ඇමරිකාව පවසයි.
මෙම සිදුවීම සම්බන්ධයෙන් කරුණු පැහැදිලි කිරීම සඳහා ධවල මන්දිරය විසින් විශේෂ මාධ්ය හමුවක් ද කැඳවා තිබුණි.
මෙම නෞකාව අත්අඩංගුවට ගැනීමේ මෙහෙයුම සඳහා බ්රිතාන්ය හමුදාවන්ගේ පූර්ණ සහාය ලැබී ඇති බව එක්සත් රාජධානියේ ආරක්ෂක අමාත්යාංශය තහවුරු කරයි. විශේෂයෙන් ගුවන් ආවේක්ෂණ කටයුතු සහ නාවික හමුදා සහාය ලබා දීමට බ්රිතාන්ය ගුවන් හමුදාව (RAF) සහ නාවික හමුදාව කටයුතු කර ඇති අතර, ස්කොට්ලන්තයේ සහ අයිස්ලන්තයේ ගුවන් තොටුපළවල් හරහා විශේෂ හමුදා ගුවන් යානා කිහිපයක් මෙම ප්රදේශයේ නිරීක්ෂණ කටයුතුවල නිරත වූ බව ගුවන් ගමන් දත්ත මගින් අනාවරණය වී තිබේ. මෙය ගෝලීය ආරක්ෂාව තහවුරු කිරීමේ ඒකාබද්ධ ප්රයත්නයක් බව බ්රිතාන්ය ආරක්ෂක ලේකම්වරයා පෙන්වා දෙයි.
රුසියාවේ ප්රවාහන අමාත්යාංශය මෙම ක්රියාව දැඩිව හෙළා දකින අතර, අදාළ නෞකාවට රුසියානු ධජය භාවිත කිරීම සඳහා තිබී ඇත්තේ තාවකාලික අවසරයක් පමණක් බව ප්රකාශ කරයි. අන්තර්ජාතික මුහුදු සීමාවේදී වෙනත් රටක අධිකරණ බලය යටතේ ලියාපදිංචි නෞකාවකට බලය යෙදවීමට කිසිදු රාජ්යයකට අයිතියක් නොමැති බව රුසියාව අවධාරණය කර සිටී. මොස්කව් වේලාවෙන් පස්වරු 3:00 ට පමණ ඇමරිකානු නාවික හමුදාව නෞකාවට ගොඩවී ඇති බවත්, ඉන් අනතුරුව නෞකාව සමඟ පැවති සන්නිවේදන සබඳතා සම්පූර්ණයෙන්ම බිඳ වැටුණු බවත් රුසියානු බලධාරීහු සඳහන් කරති.
නෞකාවේ සිටින රුසියානු පුරවැසියන්ට මානුෂීය සහ නිසි සැලකීම් ලබා දිය යුතු බවට රුසියානු විදේශ අමාත්යාංශය ඇමරිකාවෙන් ඉල්ලා සිටින අතර, ඔවුන්ගේ අයිතිවාසිකම් ආරක්ෂා කරන ලෙසත් නැවත රුසියාවට පැමිණීමට බාධා නොකරන ලෙසත් මොස්කව් පාලනය බලකර සිටී. රුසියානු සහ ඉරාන සම්බාධක මග හැරීමේ ජාලයට එරෙහිව බ්රිතාන්යය දිගටම පියවර ගන්නා බවත්, මෙවැනි ක්රියා ත්රස්තවාදය සහ ගැටුම් පෝෂණය කිරීමට හේතුවන බවත් බ්රිතාන්ය ආරක්ෂක අංශ පෙන්වා දෙයි. ඓතිහාසිකව වෙනිසියුලානු සහ ඉරාන ඛනිජ තෙල් ප්රවාහනයට සම්බන්ධ බව කියන මෙම නෞකාව අත්අඩංගුවට ගන්නා අවස්ථාවේ හිස්ව තිබූ බව වාර්තා වේ.
